Jernbanedirektoratet Nyheter Meir til vedlikehald og fornying skal gi ein meir driftssikker jernbane

Statsbudsjettet 2026:

Meir til vedlikehald og fornying skal gi ein meir driftssikker jernbane

I tråd med Jernbanedirektoratet sine faglege råd, foreslår regjeringa å auke løyvinga til vedlikehald og fornying med éin milliard kroner neste år. Den auka satsinga er heilt nødvendig for å kunne tilby passasjerane og godsselskapa ein meir driftssikker jernbane.

Jernbaneinfrastrukturen har store variasjonar i alder og tilstand, noko som svekker driftsstabiliteten og aukar behovet for vedlikehald og fornying. Meir ekstremvêr og tekniske feil på aldrande tog bidrar også til forsinkingar og innstillingar, og det er nødvendig med både utskifting av eksisterande tog og investering i fleire tog for å sikre meir stabil drift og auka kapasitet.

Satsinga gir resultat

Auka satsing på vedlikehald og fornying gir resultat. Ein samla jernbanesektor samarbeider tett for å oppnå forbetringar i driftsstabiliteten. Jernbanedirektoratet følger systematisk opp resultata av igangsette forbetringstiltak, parallelt med at nye, målretta tiltak blir identifisert og sett i verk.

I forslaget til statsbudsjettet, følger regjeringa Jernbanedirektoratet sine faglege råd om å styrke satsinga på digitale løysingar for sømlaus mobilitet, slik at det blir enklare for innbyggarane å planlegge og gjennomføre ei reise på tvers av ulike transportformer.  

Vedlikehold på jernbanen ved Oslo SFoto: Siv Dolmen
I tråd med Jernbanedirektoratet sine faglege råd, foreslår regjeringa å auke løyvinga til vedlikehald og fornying med éin milliard kroner neste år.

Stadig fleire tar toget

Talet på reisande på jernbanen fortset å auke. I første halvår auka talet påstigingar med drygt fem prosent samanlikna med same periode i rekordåret 2024.

Regjeringa har i statsbudsjettet prioritert å auke kapasiteten på fleire strekningar. Dei vil prioritere ferdigstilling av pågåande dobbeltsporprosjekt på Østfoldbanen til Moss, Vestfoldbanen til Tønsberg og Dovrebanen til Hamar. Dette vil gi rom for vesentlege tilbodforbetringar, og bidra til betre driftsstabilitet. I tillegg kjem kjøp av nye tog.

Gods på bane under press

Godstogselskapa er særleg sårbare for driftsavbrot på grunn av få omkøyringsmoglegheiter, noko dei har erfart dei siste åra ved at fleire banestrekningar har vore langvarig stengd som følge av naturhendingar som flom og ras. Dei vil dermed nyte ekstra godt av forventa betre driftsstabilitet som resultat av den auka satsinga på vedlikehald og fornying. 

Miljøstøtta for godsoverføring frå vei til bane vart auka i revidert nasjonalbudsjett i vår samanlikna med den opphavlege løyvinga i statsbudsjettet for 2025. Direktoratet anbefalte at den auka miljøstøtta blir vidareført neste år, noko regjeringa går inn for i forslaget til statsbudsjett for 2026. På godsområdet har direktoratet også jobba med å få på plass kompensasjon for inntektsbortfall og forbetringar i ordninga for ytingar ved driftsavbrot.

Les meir om statsbudsjettet 2026

Pressemeldingar på regjeringen.no